سکسن ایلدن بری تکرارلانان بیر تراژدی نین بیر داها باشلانماسینا یاخینلاشماقداییق. سکسن ایلدیر بوتون انسانی دگرلره و بیلیمسل گئرچکلره ضید بیر شکیلده گونئی آذربایجانلی تورک اوشاقلارینین استعدادلاری و باشاریلاری اؤز آنا دیللرینده تحصیل آلماقدان محروم ائدیلمک صورتی ایله قیسیرلاشدیریلماقدادیر. بوتون اؤزگور میللتلرین اوشاقلاری اوچون بیر سئوینج، شنلیک وهیجان اوجاغی اولان مکتب، سکسن ایلدیر گونئی آذربایجانلی تورک اوشاقلاری اوچون بیر قورخو و ازیکلیک داخماسینا چئوریلمیشدیر. آذربایجان تورک میللتینین کئچمیشی و گلجه گی فارس آپارتایدینین مکتب آدی وئردیگی عدالت سیزلیک سمبولو، بو ظلم خانالاردا سکسن ایلدن بری یانماقدادیر. یئنه اوخوللارین آچیلیش گونو اولان بیر مهر (23 سپتامبر) گلیب چاتیر و یئنه ایران دؤولتی ظالیمجه سینه و خایینجه سینه ملتمیزین یاسال، تاریخسل و انسانی حاققی اولدوغو حالدا سلب ائدیلمیش تورک دیلینده تحصیل حاققینی گئری وئرمکدن امتینا ائدیر

آذربایجان میللی دیره نیش تشکیلاتی (آ.م.د.ت) اولاراق میللتیمیزین اوغرادیغی بو حاقسیزلیغی بوتون شیددتی ایله قییناییب ایلک اوخولدان اعتیباراً تورک دیلینده تحصیل آلماق حاققی داخیل اولماقلا میللیمیزین بوتون میلی و کولتورل حاققلارینین بیر آن اؤنجه گئری وئریلمه سینی ایسته ییریک. آیریجا آذربایجان میللی دیره نیش تشکیلاتی اولاراق بوتون اینسان حاقلاری و اولوسلار آراسی قورولوشلارا سسله نرک اونلاری بو حاقسیزلیق قارشیسیندا سسسیز قالماماغا و بو حاقلارین ایعاده سی اوچون ایران دؤولتینه باسغی یاپماغا چاغیریریق

آذربایجان میللی دیره نیش تشکیلاتی بو آجی و حوزون لندیریجی گونده باشدا میللی قوروم و قورولوشلاریمیز، حابئله صدیق و قورخماز میللی فعاللاریمیز اولماقلا، آذربایجان تورک میللتینین هر بیر فردینی گؤروه چاغیریب هرکسی بارشجیل و دمکراتیک منفی مجادله یه دعوت ائدیر. شوبهه سیز بئله نچی بیر گونده هر کس اؤز یولو و مئتودو ایله منفی مجادله ائده بیلر و هئچ اولماسا اطرافینداکی اینسانلاری دانیشاراق آیدینلادابیلر. البته طبیعی دیر کی بو حاقدا اساس وظیفه میللی قورولوشلاریمیزین چیگنینه دوشمکده دیر.  اینانیریق کی 85جی ایلین خوردادیندا عومومی آیاقلانماسی ایله و سون سئچکی اولایلاریندا دا آکتیو سسسیزلیک توتومو ایله اؤز یوکسک سیاسی شعور و میللی بیرلیگینی گؤزلر اؤنونه سریب دوشمانلاری خیال قیریقلیغینا اوغرادان میلتیمیز، جان داماری قدر حیاتی اهمییته صاحیب اولان تورک دیلی مسأله سینده ده اؤز گوج و ایقتیدارینی اورتایا قویا بیله جکدیر

آذربایجان میللی دیره نیش تشکیلاتی

گونئی آذربایجان

27/06/1388