تبریز سسی : تاريخي طالعيميزده کي  اولوسال گونلردن بيري 1918-جي ايلين 15 سئنتيابريدير. تأسوف کي، هله ده بو گونون اهميتيني لاييقينجه ديرلنديره بيلمه ميشيک. ائله مقاملار وار کي، ميلتين، دؤولتچيليگين وارليغي نين تاميناتچيسي اولور. 15 سئنتيابر بئله عوضسيز مقاملارداندير. آذربايجان خالق جومهوريتي حؤکومتي 1918-جي ايلين 15 سئنتيابرينا کيمي گنجه ده فعاليت گؤستريردي. سووئت روسيياسي گنج جومهوريتي ييخماق اوچون هر جور فيتنه-فسادا ال آتيردي. گنج جومهوريتين آياقدا قالماسي، ميلتيميزين سياسي ايراده سيني تصديق ائتمه سي اوچون باکي کيمي استراتئژي جهتدن گرکلي مؤوقعده يئرله ميش، اهالي نين داها چوخ جمعلشديگي، صنايعی نين اينکيشاف ائتديگي، زنگين نئفت معدنلري نين اولدوغو اراضي نين پايتاخت کيمي تانينماسي آذربايجانين حالال، تاريخي اراضيلري اوغروندا موباريزه سي نين يئني سويه ده وسعت آلماسي دئمک اولاجاقدي.قهرمان تورک اوردوسونون آذربايجانا کؤمه يه گلمه سي حاديثه لرين سونراکي اينکيشافيندا آذربايجان خالق جومهوريتي نين معين دؤورده ده اولسا، اؤزونه گلمه سينه، موستقيل دؤولت اولاراق تانينماسينا بؤيوک تکان وئردي. هابئله بو حاديثه  ايکي قارداش تورک خالقي نين معنوي بيرليگي نين ثوبوتو اولدو. 1918-جي ايلين 15 سئنتيابري تاريخي طالعييميزده اهميتلي بير دؤنوش گونو ايدي. تورک اوردوسونون بو دؤنمده تکجه قوزئي آذربايجاندا دئييل، هابئله گونئي آذربايجاندا دا بؤيوک خيلاصچيليق عملي اولوب.  

گونئي آذربايجانين تاريخي ايله باغلي تانينميش آراشديرماچي اکرم رحيملي بيلديرير کي، باکي آزاد اولونان واختي خويدا، اورمييادا، سلماسدا و باشقا شهرلرده، ديگر ياشاييش منطقه لرينده ائرمنيلر تورکلره قارشي سويقيريمي تؤره ديبلر. مقصد تورکلري سارسيديب محو ائتمک ايدي:  " تورک اوردوسونون بير قولو قوزئي آذربايجانا، سون نتيجه ده ايسه باکييا – اؤلکه ميزين پايتاختيني خيلاص ائتمه يه کؤمک اوچون گلميشدي. تورک اوردوسونون ديگر قولو اگر گونئيه گئتمه سه ايدي، گونئي آذربايجانداکي قيرغينلارين ميقياسي تصوورگلمز درجه ده آرتاجاقدي. تورک اوردوسونون باکي نين قورتولوشوندا نه درجه ده ميثيلسيز رولو وارسا، گونئي آذربايجاندا خويون، سالماسين، اورمييانين آزاد اولونماسيندا رولو او قدر عوضسيزدير. تورک اوردوسو گلنه کيمي اورادا ياشايان سويداشلاريميزا قارشي سويقيريم اولموشدو. آنجاق تورک اوردوسونون گليشي ايله قيرغينلارين قارشيسي آليندي. ائرمنيلر عوموميتله، اورادا ياشايان تورکلري سون نفرينه کيمي قيريب محو ائتمه یي قارشيلارينا مقصد قويموشدولار. تورک اوردوسو گونئي آذربايجاندا دا خيلاصکارليق ائتدي. قوزئي آذربايجاندا ائرمني وحشيليگينه قارشي اولان تورک اوردوسونون جيدي موقاويمتي گونئي آذربايجاندا دا گئديب " .  

مرحوم تاريخچي-عاليم صمد سردارينييا آراشديرمالاريندا تورک اوردوسونون هونرورليگيندن سؤز آچير. دئمه لي، ائرمنيلر تورک اوردوسونون گلديگيني گؤروب اورمييا گؤلو واسيطه سيله شرابخانايا دوغرو قاچيرلار. بو حاديثه  تخمينا 1918-جي ايلين سئنتيابريندا باش وئرير. تورک اوردوسونون حيصه لري بونلاري قاييقلارلا تعقيب ائديرلر. تورک اوردوسونون بير عسگري قاييقلاردان بيرينه ياناشاندا ائرمنيلر اونون قولونو قيلينجلا يارالاماغا ايمکان تاپيرلار. تورک عسگري يارالانماسينا باخماياراق قاييقداکي بوتون ائرمنيلرين هاميسيني - 18 نفري سويا تؤکرک محو ائدير. بئله ليکله، ائرمنيلرين شرابخانايا گئديب چيخماسي نين قارشيسي متانتله آلينير. ايران تاريخچيلري نين بعضيلري اعتيراف ائديرلر کي، اگر او دؤورده تورک اوردوسو کؤمه يه گلمه سه يدي، ائرمنيلر خريستيان دؤولتلري نين کؤمه گيله اورمييادا، سالماسدا، خويدا سويقيريم ايستکلريني باشا چاتديراجاق، تورکلرين آخيرينا چيخاجاقديلار. بو، فاکتدير. بو فاکت ايسه عوموميليکده تاريخ شوناسليقدا قابارديلمير، وئريلمير، اونا گؤره کي، تورکييه تورکلري ايله آذربايجان تورکلري نين ياخينليغي چوخ اولماسين. ايران اينقيلابيندان سونراکي آراشديرمالاردا بو مسئله ايله باغلي بعضي اعتيرافلار وار. مرحوم تاريخچي صمد سردارينييانين کيتابلاريندا ( " آرازين هر ايکي ساحيلينده تورکلرين سويقيريمي "  و  " ايروان موسلمان ساکينلي شهر اولموشدور " ) سؤزوگئدن مؤوضوعا توخونولوب.  

پروفئسور توفيق ولي يئوين فيکرينجه، 1918-جي ايل سئنتيابرين 15-ده باکي نين تورکلر طرفيندن آزاد اولونماسي تاريخي گئنيش سويه ده آراشديريلماليدير:  " يوزلرله تورک عسگري تورپاقلاريميزين آزادليغي اوغروندا شهيد اولوب. بو مؤوضوعدا تاريخچيلر آرديجيل جيدي آراشديرمالار آپارماليدير. آذربايجانين بير چوخ بؤلگه لريني ائرمني وحشيليگيندن، قاتيلليگيندن خيلاص ائدن قهرمان نورو پاشا باره سينده اوره ک دولوسو دانيشيلماغا حاقي اولانلارداندير. سووئت دؤورونده نورو پاشالارين حاقيندا دانيشماق ياساق ايدي. ايمپئرييا تورکلوک دويغوسونو اؤلدوروردو کي، آنتي تورک مئيللري، تورکون دوشمنلريني خالقيميزا خيلاصکار کيمي سيريسين. ايندي ايسه قهرمان تورک عسگرلري نين خيلاصکارليغي باره ده داها چوخ يازيلمالي، راديو-تئلئويزييادا داها چوخ دانيشيلماليدير کي، ميلتيميز دوستو ايله دوشمنيني ياخشي تانيسين " .  

يئري گلميشکن، نورو پاشا 1889-جو ايلده ايستانبولدا حربچي احمد توفيقين عاييله سينده آنادان اولوب. اولو بابالاري نين کريم تورکلريندن اولدوغو بيلديريلير. 1906-جي ايلده قورو قوشونلاري حربي مکتبينه داخيل اولوب، 3 ايل سونرا همين مکتبي لئيتئنانت روتبه سي ايله بيتيره رک 3-جو اوردو کوماندانليغيندا ضابيط کيمي خيدمته باشلاييب. 1910-جو ايلده پادشاها مخصوص پييادا بؤلوگونه کئچيريليب. 1911-جي ايلده حربي آکادئميياني بيتيريب، 2 ايل سونرا يوزباشي، (کاپيتان)، 1916-جي ايلده مينباشي (مايور)، 1918-جي ايلده ايسه يارباي (پودپولکوونيک) روتبه لري آليب. 1-جي جاهان ساواشي ايللرينده شيمالي آفريکا جبهه سينده ليوييا اراضيسينده جبهه  کومانداني اولاراق دؤيوشلره رهبرليک ائديب. شوجاعتلرينه گؤره آلمانييانين، آوسترييا-ماجاريستانين و تورکييه نين مئداللاري ايله تلطيف ائديليب. 1918-جي ايلين يازيندا آذربايجاني و داغيستاني خيلاص ائتمک اوچون قرارگاه ياراديلير. نورو پاشا قافقاز ايسلام اوردوسونون کومانداني تعيين اولونور. او، عوثمانلي دؤولتي نين حربي ناظيري انور پاشانين قارداشي ايدي. بو دؤورده باکي نئفتي اوغروندا گئدن موباريزه ده آلمانييانين شوبهلنديريلمه مه سي اوچون اوردونون محض بئله آدلانديريلماسي، اوردونون عسگري قوه سي نين آذربايجان تورکلريندن ياراديلاجاغي ايدئياسي اورتادا ايدي. اولجه تبريزه گلن نورو پاشا اورمييا اطرافيندا ائرمنيلره آغير ضربه لر ائنديرير. مايين 20-ده زنگه زورا چاتير، جاماعات طرفيندن سئوينجله قارشيلانير. مايين 25-ده گنجه يه گلير، قيسا مودتده گنجه دن زنگه زورا کيمي اولان بؤلگه لرده آساييش يارادير. اييونون 20-ده باکي نين آزاد ائديلمه سي پلانيني گئرچکلشديرمک اوچون انور پاشايا موراجيعت ائدير، علاوه  قوه، حربي سورسات آلير. بو دؤورده باکي سووئتي نين تابعليگينده کي  قوه لرين سايي 20 مين نفردن چوخ ايدي.  

باکييا هوجوم عرفه سينده نورو پاشانين تابعليگينده 14 مين نفر دؤيوشچو وار ايدي: بونون 8 مينيني تورکييه، 6 ميني ايسه آذربايجان تورکلري تشکيل ائديردي. نورو پاشا ايشغالچيلار قارشيسيندا شهرين دانيشيقسيز تسليم اولونماسي، عسگرلرين شهرين مودافيعه سيندن چکيلمه سي، سيلاحلارين، دؤيوش سورساتلاري نين، املاک و بينالارين تحويل وئريلمه سي، نارگين آداسيندا ساخلانيلان تورک، آلمان، آوسترييالي حربي اسيرلرين گئري قايتاريلماسي، زيرئهلي ماشين، طياره و ديگر آنبارلارين تحويل وئريلمه سي کيمي طلبلر قويور. سئنتيابرين 14-ده باشلايان هوجوم 15-ده قلبه ايله باشا چاتير. تورک قوشونلاري باکي نين آزاد اولونماسي زاماني 1130-دان آرتيق شهيد وئريب. 1918-جي ايل سئنتيابرين 23-ده تورکييه نين باش ناظيري طلعت پاشانين آلمانييا ايله باغلاديغي گيزلي پروتوکولا اساسا عوثمانلي دؤولتي قوه لريني آذربايجاندان چيخارماقلا باغلي عؤهده ليک گؤتورور. نويابرين 30-دا آتلانتا ايله عوثمانلي دؤولتي آراسيندا  " مودروس "  صولح موقاويله سي ايمضالانير: عوثمانلي دؤولتي بولقاريستان و آوسترييا-ماجاريستاندان سونرا مغلوبيتيني اعتيراف ائدير. بئله ليکله، قهرمان تورک اوردوسونون آذربايجاني ترک ائتمه سي مسئله سي قاچيلماز اولور. 1920-جي ايل آپرئل چئوريليشيندن سونرا نورو پاشا گيزلينجه داغيستاندان کئچه رک قاراباغا گلير، قاراباغدا و زاقاتالادا خالقي سووئت ايمپئريياسي علئيه اينه عوصيانا قالديرير. لاکين مغلوب اولاراق گئري دؤنمه يه مجبور اولور. 1923-جو ايلده تقاوده چيخير، ايستانبول اطرافيندا دميرتؤکمه فابريکي آچير. 1949-جو ايل مارتين 2-ده فابريکده باش وئرميش پارتلاييش نتيجه سينده هلاک اولور.  

ائلچين قاليب اوغلو