آمستئردام دیالوق توپلانتیسی ایران ایسلام جومهورییتی نین سیاسی، ایقتیصادی و ایجتیماعی بؤحرانلار ایچینده چابالادیغی گونلرده کئچیریلمکده دیر. سیاسی حاکیمییت جیدی سارسینتیلار ایچینده دیر. ایراندا یاشایان میللتلر، اوللر اولدوغو کیمی، بو رئژیمین باسقیسی آلتیندا یاشاماق ایستمه دیکلری اوچون اؤز اعتیراضلارینی بیلدیرمکده دیرلر. دینی دئسپوتیزمین سونو گلدیگی بو گونلرده آذربایجان تورک میللتینین میللی موباریزه سینه داها گئنیش شکیلده شاهید اولماقداییق. داها اؤنجه دن آذربایجان میللی حرکاتی " 1 اردیبهشت، آذربایجان اؤرنجی حرکاتی"(1374)، "دانیشیر آذربایجان" (1384) و تبریزده قبول اولونان "بیرینجی آنا دیلی قورولتایی نین قطعنامه سی" (1384)، بابک قالاسینا یوروشلر، 1 خورداد، میللی قییامی(1385) کیمی ، اؤنملی تاریخی درینلیگی اولان اولایلاری مئیدانا گتیرمیشدیر. آمستئردام دیالوق توپلانتیسینا قاتیلان وطنداشلاریمیز میللی حرکات سیرالاریندا اهمییتلی اورتاق یؤنلرین وار اولدوغونا قطعییتله اینانیرلار. حرکاتین سیرالاریندا چوخسسلیلیگی قبول ائدیرلر. تک سسلی بیر فعالییتی رسمییته تانیمیرلار. تاریخی اهمییت داشییان آمستئردام توپلانتیسی ایشتیراکچیلاری آذربایجان میللی حرکاتی نین سیرالاریندا چئشیدلی فیکیر و سیاسی آخیملارین وار اولدوغونو بیر رئاللیق و ساغلام دوروم کیمی گؤرورلر. بو گؤروش دییشیکلیگی، مدنی موختارییتی، فئدئرالیزمی، ایستیقلالییتی و بوتؤو آذربایجان دؤولتی قورماق کیمی پلاتفورملاری ائحتیوا ائتمکده دیر. توپلانتی بوتون دییشیک گؤروشلری آذربایجانین مشروع سیاسی جریانلاریی کیمی قبول ائدیر و فرقلیلیکلرین بیر زنگینلیک اولدوغونا اینانیر.
ایران ایسلام جومهورییتی داخیلدن و خاریجدن جیدی تضییقلر آلتیندادیر. بو سببدن رئژیم هر گون جمعیت اوزرینه باسقیسینی آرتیرماق و میللی حرکتی ازمک ایستیهجک. میللی دیره نیش آرتدیقجا، رئژیمین تضییقلری آرتا بیلر. چونکو حاکیمییت بو دورومدان گئری آددیم آتارسا، اؤز مغلوبییتینه ایمضا آتمیش اولار. بو اوزدن ده گون کئچدیکجه، رئژیمین تضییقلرینین آرتاجاغینا شاهید اولوروق. بئله بیر دورومدا میللی حرکاتین خاریجده کی فعاللاری نین اوزرینه بؤیوک تاریخی مسئولیت دوشمکده دیر. بو میللی – تاریخی وظیفهنی آنلاماق اوچون میلتیمیزین اساس ایستکلرینی درک ائدیب، بوتون ایمکانلارا دایاناراق، میللی حرکاتی مودافیعه ائتمه لی و گوجلندیرمه لیگیک.
21 آذر آیریجا، بؤیوک میللی لیدر سید جعفر پیشهوری نین اؤز میلتینه گوونهرک، تاریخ یاراتدیغی دوغما میللی بیر گونودور. بو تاریخی گون موناسیبتی ایله وطنیمیزین قورتولوشو ایله باغلی قرارا گلمک، میللی بیرلیک نومونه سی سرگیله مک هئچ ده تصادوفی دئییلدیر.
میللی حرکاتین گئنیش میقیاسلی اولدوغونو قبول ائدن 21 آذر آمستئردام دیالوق توپلانتیسی بوتون فرقلی گؤروشلری گؤز اؤنونده بولوندوراراق، آشاغیداکی مادده لری اورتاق پرینسیپلر اولاراق قبول ائدیر:
1- توپلانتی، گونئی آذربایجان تورک میلتی نین میللی آزادلیغی یولوندا موباریزه ده بو گونکو فارس راسیسمینی تمثیل ائدن ایران ایسلام جومهورییتینی اساس مانعه کیمی گؤرور. چونکو بو رئژیم هر نؤوع دئموکراتیک دییشیکلییه قارشیدیر.
2- آذربایجان میللی آزادلیق حرکاتی نین آمالی گونئی آذربایجاندا میللی – دئموکراتیک دؤولت قورماقدیر. آیریجا، گونئی آذربایجانین حودودلاری خاریجینده یاشایان دیگر تورک خالقلاری نین میللی حاقلارینی دا قوروماق لازیمدیر. آذربایجان میللی حرکاتی اؤز موقددراتینی تعیین ائتمکده سون سؤز صاحیبی اولمالیدیر.
3- آذربایجان میللی حرکاتی سئکولار دؤولت قورولماسی نین طرفداریدیر و بو یولدا موباریزه آپاریر.
4- تورک دیلی (آذربایجان تورکچه سی) رسمی دؤولت دیلی اولمالیدیر. بوتون اؤلکه ده یاشایان تورکلر اوچون تورک دیللی مئدیا شبکه لری قورولمالیدیر. آذربایجانین علمی، تئخنیکی و ایقتیصادی اینکیشافی تأمین ائدیلمهلی، میلتیمیزین یاشاییش سوییه سی دونیانین اینکیشاف ائتمیش میلتلری سوییه سینه یوکسلمه لیدیر.
5- آذربایجان میللی حرکاتی، بوتون ساحه لرده قادین- کیشی حوقوق برابرلیگی یولوندا موباریزه آپاریر.
6- دین، مذهب، مسلک، اینانج، سؤز، مطبوعات، سندیکالار، سیاسی پارتییالار، گئییم و یاشام طرزی کیمی، بوتون مدنی آزادلیقلار قئیدسیز-شرطسیز تامین ائدیلمه لیدیر.
7- آذربایجان میللی حرکاتی اعداما و هر نؤوع ایشگنجه یه قطعی شکیلده قارشیدیر.
8- میللی حرکات آریا راسیسم سیستئمی نین تمثیلچیسی اولان ایران ایسلام جومهورییتینه نین آذربایجاندا دئموقرافیک یاپینی دییشدیرمه سییاستینه قارشی چیخیب و بو رئژیمه قارشی میللی ظولم آلتیندا یاشایان دیگر میلتلرله ایشبیرلیگی آپارمالیدیر.
9- یوخاریدا قئید ائدیلن هدفلره چاتماق اوچون خاریجده فعالییت گؤسترن آذربایجانلی قوووه لر، داخیلده گئدن میللی موباریزهنی دیقتله تعقیب ائتمه لی و اونا اولوسلار آراسی اینسان حاقلاری مرکزلریندن دستک قازانمالی، آذربایجانا قارشی اینفورماسییا بلوکاداسینی قیرمالی و بوتون دونیادا آذربایجان میللی منافعی اوچون لوببیچیلیک فعالییتلرینی تشکیلاتلاندیرمالیدیر.
10- گونئی آذربایجان میللی حرکتی موستقیل، دئموکراتیک و مودئرندیر.
11- گونئی آذربایان میللی آزادلیق حرکاتی دونیا اینسان حاقلاری بیاننامهسینین و اونا باغلی کونوانسییونلارین آذربایجاندا حیاتا کئچیریلمه سی اوچون موباریزه آپاریر.
12- آمستئردام دیالوق توپلانتیسی یوخاریداکی پرینسیپلره دایاناراق گونئی آذربایجان میللی حرکاتیندا فعالیت گؤسترن بوتون تشکیلاتلار و شخصلری داواملی ایشبیرلیگی مئخانیزماسینن قورولماسینا چاغیریر.
یاشاسین آذربایجان
یاشاسین میللی بیرلیگیمیز
آمستئردام 21 آذر -12 دئکابر 2009
